ភ្នំពេញ៖ ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្តេចក្រឡាហោម ស ខេង បានបញ្ជាក់ថា ចាប់ពីឆ្នាំ២០២៤ តទៅ រាជរដ្ឋាភិបាលនឹងផ្ទេរការគ្រប់គ្រងវិស័យអប់រំកម្រិតបឋមសិក្សា មតេយ្យសិក្សា ការអប់រំកុមារតូច ទៅឱ្យរដ្ឋបាលថ្នាក់ក្រោមជាតិវិញ ក្រោយពីបានអនុវត្តសាកល្បងនៅក្នុងខេត្តបាត់ដំបងកាលពីឆ្នាំ២០២០។

រដ្ឋមន្ត្រីក្រសួងមហាផ្ទៃ បានលើកឡើងបែបនេះនៅចំពោះមុខនាយកអង្គការយូនីសេហ្វ (UNICEF) ប្រចាំនៅកម្ពុជា លោក Will Parks ដែលចូលជួបសម្តែងការគួរសមជាមួយសម្តេចក្រឡាហោមកាលពីថ្ងៃទី២៤ ខែឧសភា ឆ្នាំ២០២៣។

នាយកអង្គការយូនីសេហ្វ (UNICEF) ប្រចាំនៅកម្ពុជា លោក Will Parks បានគូសបញ្ជាក់ថា អង្គការនឹងបន្តជួយគាំទ្រដល់កិច្ចការងារពាក់ព័ន្ធក្នុងការលើកកម្ពស់ស្ត្រី និងការគាំពារដល់កុមារនៅថ្នាក់ក្រោមជាតិ ដោយផ្សារភ្ជាប់ទៅនឹងគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា។ លោកក៏បានបញ្ជាក់ពីផែនការសកម្មភាពរយៈពេល ៤ឆ្នាំរបស់អង្គការយូនីសេហ្វ (២០២៤-២០២៨) នៅកម្ពុជា។

ខណៈរាជរដ្ឋាភិបាលនឹងចាប់ផ្តើមផ្ទេរមុខងារលើវិស័យអប់រំឱ្យថ្នាក់រដ្ឋបាលថ្នាក់ក្រោមជាតិគ្រប់គ្រងវិញពីឆ្នាំ២០២៤ តទៅ សម្តេចក្រឡាហោម ស ខេង បានស្នើឱ្យមន្ដ្រីជំនាញរបស់អង្គការយូនីសេហ្វ សហការជាមួយនឹងអគ្គនាយកដ្ឋានរដ្ឋបាល ព្រមទាំងលេខាធិការដ្ឋាន នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) របស់ក្រសួងមហាផ្ទៃ អនុវត្តលើផែនការសកម្មភាព៤ឆ្នាំ ដែលកំណត់ដោយអង្គការយូនីសេហ្វ។

សូមរំលឹកថា កាលពីឆ្នាំ២០២០ រាជរដ្ឋាភិបាលបានសាកល្បងផ្ទេរអំណាចឱ្យរដ្ឋបាលថ្នាក់ក្រោមជាតិ គ្រប់គ្រងកម្រិតបឋមសិក្សា មតេយ្យសិក្សា ការអប់រំកុមារតូច ក្នុងខេត្តបាត់ដំបង។ ដោយឡែក កម្រិតចាប់ពីអនុវិទ្យាល័យឡើងទៅ ក្រសួងអប់រំជាអ្នកគ្រប់គ្រងដដែល៕